ماننساك .. يمظفر..

ميسون نعيم الرومي
2022 / 5 / 28

يا قصة شعر باشفاف عطشانه
يالما ساومت لاهادنت والروح تعبانه
يالبچـَّـتك سفينه السيست من غير سفانه
يا عقد انفرط والدنيه حزنانه
اشيحچي الشعر.. شيگول
وانت الچنت عنوانه
***
يبن بغداد يالكلك وفه او اخلاص
ثوره انت والثوار تتلگاك
كل الشعب هاليوم هاليتناك
يا أرض العراق الطيبه تتلگاك
(والتينه والشباچ) ..
(والخبزه واستكين الچاي)هم تاناك
(لميت الحزن واثياب الصبر) وياك
(مشه بيك الدرب) ...
لرض النجف وداك
على اچتاف الشباب الحبك اوتاناك
هتف حيل اوصاح ..عد عيناك
يمشي ابموكبك ابكل شارع اتحبه
لكن للأسف .. اتلفلف خلص هيچي ابساع
صاح الصوت هالملتاع :-
لا .. لاتشرد بالنعش الگلوب مدميه
-(مظفر للشعب مو للحراميه)-
ابهيده ابموكبه .. موهيچي تركض بيه ...
شعبه يودعه ايريد وايحاچيه
عوفه للشعب .. للخضراء روح ارجع ..
عوف النعش للحبوه .. روح ارجع ..
روح ارجع ..
***
محبوب الشعب (يالنواب) ..
الله اوياك
نجمه ابسمانه تظل ..
ما ننساك
مدرسة الشعر ...
يالاسمك عله فوگ فوگ الغيم
يا بيرغ وطن والوطن ما داراك
حيف او ألف وسفه اوحيف ما جازاك
اعتب ع الزمن ..
ع المرض هذا الجاك ...
وابعز العطاء الغيبك ما خلاك
يمظفر يبن بغداد يمدلل ...
لا .. لا أبد ما ننساك
يا ابن العراق الشعب ما ينساك
يا رمز النظال الأبد ما ينساك
اوداعة الله .. الله اوياك ماننساك ...
ماننساك
-------------------------------------------
مدرسة الشعر الذي نذر نفسه للقضايا الانسانية
ومناصرة الطبقة المسحوقة والفقراء وهوابن الطبقة الارستقراطية
الذي ولد وفي فمه ملعقة من الذهب ترك كل ذاك العز وعاش مع الفلاحين
ومشردا بين الدول سلبوه كل شيء حتى الجواز العراقي والراتب التقاعدي
لك المجد والخلود ايها البطل الاسطورة ايها المعجزة الشعرية يا نخلة العراق الشامخة
يا مظفر النواب يا ابن الشعب الذي غادرعالمنا يوم الجمعة 20 مايو 2022
------------------------------------------------------------------------------------------
28/5/2022
ســـــــــــــــــــــــــــتوكهولم

حوار مع الكاتبة اللبنانية د. عايدة الجوهري حول مشروع الدولة المدنية العلمانية وأوضاع المرأة في لبنان
حوار مع د.سامي الذيب حول الأديان ومعتقداته الدينية وطبعته العربية وترجماته للقرآن والقضية الفلسطينية