هلهولة فرح....شعر غنائي

ميسون نعيم الرومي
2020 / 9 / 21

هلهولة فرح

مثل هلهولة فرح
يتضاحكن لو مرن احديثات
اوعلى رنـْـة الحجل..
يتمايلن وكت العصر ترفات
قداح اويعط بالدرب
لو مرن احليوات
لون السنابل ع الوجه
والطول چن شمعات
والگذله خيط امن الشمس
وامطرزه ابنجمات
امن ابعيد چن زفة عرس
لو غنوة اطويرات
عفه اودلال او حسن
-(لعماره) بيچن تفتخر(ميسان) يبنيات
***
الشامه ع الوجنه ضِوَت
بالروح گمريه
ترچيه اوتلاوي الزلف
اشمحلاچ يبنيه
الشعر طايح ع المتن
والشفه ورديه
لخدود نجمات اوغفن
لوني اغلطت جوريه
اطويره حلوه امضمره
حلوه امعدله اجنوبيه
وحدتهن احزام اوللظهر حوريه
چانت الناس ابفرح
والدنيه مزهيه
نحلم ابيوم اوترد
بغداد مضويه
يمته يادنيه اوترد
بغداد مضويه
-----------------------------------
21/أيلول/2020
ســـــــــــــــــتوكهولم