أم جَنّات (الى شهيدة البصره (ام جنّات) ومحبيها اهديها)

ميسون نعيم الرومي
2020 / 1 / 24

أم جـَـنـّات

الى شهيدة البصره (ام جنـّات) ومحبيها اهديها

مرتين اتيتمت ليتام (يم جنـّـات)-
مخنوگه بالگلب وابموتچ العبرات
مثل ام اواخت ما تغمض الهه عين
تسعف بالجريح الصابته الچيلات
كلهه شجاعه اوطيب كلهه اخلاص
-(اتچوچي) ع اليتيم اوترفع الرايات
***
ما رَدّت فقير ابيوم كلهه احسان
يا چف الكرم يا زينة الطيبات
بالحق تداعي اوماتهاب اشرار
يا (إخت الزلم) يا هيبه (يم جنـّات)-
صبحت (بصرتچ) مربوده كلهه اليوم
يا دم (الشــهيده)..اليطلب الثارات
***
-(ست ميـَّه) العدد دمهم جره يا ناس
اورود امفتحه والعمر (عشرينات)-
-(عشرين اوألف) مجروح يالشبان
والدم الجره نهران بالســاحات
چا وينه العدل؟ والعالم سكت ما حاس
سـلطات الغددر يا (عـِـرَّة) الســلطات
***
اتباوَع عَ الصوربالغربه وانحب حيل
الف وسفه (الشباب) او حيف (يم جنـّـات)-
امصيبه يا وطن ! عشعشت عدنه اجناب
تـكـتل بالشــعب .. واتـبـوگ للجارات
اعزي كل عراقي ابحرگه..وابچي اوياه
ما دامت ابد..متدوم..
ايام البقت معدوده بالساعات
آخ اوألف چم آخ (يم جنـّـات)-
آخ اوألف آخ
-----------------------------------------------
*ام جنات
شيعت جماهير البصرة الناشطة والمسعفة ابنة البصرة / ام جنات
جنان ماذي الشحماني... يعرفها اهل البصرة إنسانة معطاءة ومحبة لكل الناس رغم سوء وضعها الاقتصادي ... ناشطة مدنية انخرطت في مساعدة المحتاجين تعمل في حقل الأرامل والأيتام ! التحقت في الانتفاضة كمسعفة
استشهدت برصاص المليشيات الذين وجهوا بنادقهم الى خيمة المسعفين !
الجماهير هذا الهتاف في تشييعها:رددت
هايه شبابك يا وطن هايه
ضحت بدمها ورفعت الراية
الرحمة والخلود لشهيدة الحرية ولكل شهداء انتفاضة تشرين
العار للقتلة الذين يمارسون حملات إعدام علنية.. والعالم يتفرج
اوقفو قتل الشباب والشابات العراقيين
( الفهرست منقول)
-----------------------------------------------------------------------------
23/كانون الثاني/2020
ســــــــــــــــــــــــــتوكهولم