طبينه بالعشرين ..!!

ميسون نعيم الرومي
2020 / 1 / 2

چم ثامر اوچم عباس چم مكي اومراد اوچم ياسين
چم ابن ثنوه اوچم علي اوطالب..اياد..حسوني اوچم حسين
ولدك ياوطن ابكاتم اوبالساحات دمهم سال
شحسب شگول اشلون ! والعدد مامعدود يا طيبين
***
جاي اسألك ليوين ينلف بالعلم شبان يا تشرين
چم دوب نشعل بالشمع والدمع نيران ع الخدين
ســلطة غـدرســراق متســيـْده بـســم الديـن
لا ذمه اولاضمير.. اوعلى كرسي الحكم متربعين
***
هم شفتوا گبل مجلس قضاء ايغطي ع السراق؟
اوبسم الشعب نواب على بوگ الوطن متحدين؟
اوســلطه تـبـوگ النفط والثـروات لجـل الجار؟
تـظلم بالشــعب والشــعب متعوب جوعانـيـن
***
وايـتام الوطن .. كـل يـوم بـيه اتـزيــد
بوگ اوخيانه اوغدر تســويف .. چـذابين
تهجير أميـَّه اومرض..هالحال من اسنين
حروب واذبح واذناب..ملتمه مدري امنين
***
واگبور اشـكـثـر !! لا تنحســب لا تنعـد
وامك يا شــهـيـد اتـلوع .. وامطيـّـنه بالطين
يا دم الشــباب الســال .. چـَـن نهـران
احا يا وطن .. چمدوب .. ارد اسألك ليوين؟
هالراح الزمن .. طبينه (بالعشرين)-
ليوين يا كانون .. ليوين يا تشرين؟؟