بركان الغَضب (مهدات الى شبيبة الأنتفاضة المقدسة)

ميسون نعيم الرومي
2019 / 10 / 6

بـركان الغـَـضب
ميسون نعيم الرومي

بركان الغضب هالصاح واتفجـّر
(بـغـداد) العـراق اليوم تـتحـَـرر

يا (إخوة اختهم) .. هـَـبـَّـت الأبطال
نار اوتحـرگ الباغـيـن واتجـَـمـّـر

تطرد كل دخيل او اجنبي (املگـّط)-
تـِـرفع هـيـبـِتـَـك يا وطـَن واتنـَـوّر

ذلـَـوّا بالشـعب حـَرِّفـَوا بالأخلاق
خـِدْشـَـوْ بالكرامه .. اليوم هالتـثأر

ولدَك يا (عـراق) اليوم شـعلة نار
تمسـح دَمـْعـِتـَـك والأرض تتطهر

يا ارض (العراق) الطيبه ام الخيـر
*يا ارض (النبايه) .. اتصيب واتشور

(دجله والفرات) .. انـتـِـظروا التغيير
تاريـخ انكتب .. وابدم أبي اوكل حـر

اولادك هـَـذول .. الفـَخـَـر والعزه
رفعـَـوا رايـتك وابـدمهم اتعفـَّـر

تعتيم اشكثر ؟ ياعالم اعـّدِل .. شوف
العالم سـكت .. و(ايـران) تتصَدَّر

احـفـاد (الحسين) ابظلم ينذبحون
(امريكا) .. ابرگبتچ .. دمهم اتفجر

يا سـقط المتاع ! اشجابت امريكا
ايـراني الحـِكـَم .. والسافـل اتنـَـمـَّر

دم هـذا الشـباب .. ابـرگبة (امريكا)-
جبتيهم ؟
طلعيهم .. هذوله مصدرالكل شــر

سلام اعله الشباب .. النصر إلهـُم دوم
سلام الله على بغداد ..الله القادر الأكـبـَـر
-----------------------------------------
*(النبايه):- مفردها نبي
-------------------------------------------
مهدات الى شبيبة الأنتفاضة المقدسة في وطني المستباح
والتي بدأ يوم 1 / اكتوبر/ 2019
--------------------------------------------
ســـــــــــــــتوكهولم
6/10/2019