دارميات(شعر عراقي)

ميسون نعيم الرومي
2019 / 8 / 19

دارميات (شعر عراقي)
ميسون نعيم الرومي

ريض يبعد الروح .. خليني انشــدك
گلب الذبحته اهناك .. شيسوي عندك؟
***
ارد اشــلع الدلال .. واتبـرَّه منه
يرفس رفس مذبوح .. يسألني عنه
***
راح العمر وياك .. كل وكتي مهموم
دمعي على الخدين .. والکَلب مالوم
***
ريض ولك بهداي .. حاسب على اچلاي
رمحك طلع مســموم .. متعادي وياي
***
فر کَلبي يمه اوراح .. متعني عنده
راح ابعجل ملهوف .. شو بابه رده
***
أتوجه ع الضلوع .. اصوابك ذبحني
ماضلي عظم اصحيح .. والظهر محني
***
رمحك غرز بچلاي .. بالگلب سهمك
ردت آنه اصيحن آخ .. شو صحت باسمك
***
جرح النزف بالروح .. صعبه اوتلوحه
ينزف يضل ملچـوم .. ياكل ابـروحـه
***
صعبه اليضَيع احباب .. بلوه المحبه
روح التفارگ روح .. ما ضنهه لعبه
***
حتى الجرح مجروح .. يجرح بالجروح
ماتحمـل اللچمات .. تـرفه تـره الروح
***
روحي اشتهت ملگاك .. اشرد واكابر
يـوميه تـبچي اتلوع .. هالآنه صابـر
***
مولح صبيهه العين .. من صب الدموع
من الزغر لليوم .. بـس تـبجي واتـلوع
***
تچويني بالدلال .. واترد على الروح
حرگتني هاي الأوف .. تلهب بالجروح
***
غركان اخذني الروج .. وانه ابمچاني
ثاري الزمن غدار .. طكني اورماني
***
خرده تصير الروح .. مركونه ع الرف
والينشــره اوينباع .. يتغنـَّه ع الدف
--------------------------------------------
آب / 2019
ســــــــــــــتوكهولم