سحر الحضور

شيرزاد همزاني
2017 / 12 / 10

شنهو اللي صار لي
من شفتك
زخة مطر الحب
هطلت عليه
نسيت وقاري
وأختفى عقلي
عواطفي هاجت وتحكمت بيه
أقوى من سحر سحرة فرعون
هاروت وماروت نزلو بارض بابليه
قلبي صار طير وطار للعلالي
فكري أتقيد بسلاسل حديدية
قيود الحب تخليك
تعيش بغير عالم
هاي الحقيقة
گلتلك وبعد ما عليه
دير بالك تشوف حبيبي
تصير مثلي تمشي بالليل
عبالك ظهرية
مجنون أتصير
ماكو مثل حبيبي
يصيد أقسى القلوب
بنظرة حوائية
وآني أنسجنت
سعيد بسجني في
مقل أحلى آدمية
ما أريد أتحرر
ليش أتحرر
وأرجع أعيش حياة مأساوية
الحياة بدون حب
موت
لكن
الروح تبقى ساكنة بيه