غناوي من وحي الرباعيات

محيي الدين ابراهيم
2017 / 9 / 22

لو بس يوم ينزوي مولانا ف قيامة
هنلاقي جرعة دوا تشفي علل ياما
فرسان ورا فرسان وطبول وهتيفة
لا بيتنصف انسان ولا هدمته نضيفة
لكن مسير النور تنشق له غمامة .. لو بس يوم ينزوي مولانا ف قيامة


قالوا الوجع ف الجوع قلت الوجع ف القلب
ياقلبي يا موجوع ماعدتشي فاضل حب
حطوا الألم وسطنا .. لما بقى مننا
وأحلامنا من صلبنا صلبوها بعد السلب .. آه من ولاد الـ ....


الشر مابيفرقش والفقر مابيقلقش
لو كان ف قلبك وجع
قالوا عليك مش جدع
ف بلادنا يامسكين كل البدع والغش


لو دارت الأيام واتشقلبت فوق راس .. وجودك
وكل من هب ودب سب ولعن سنسفيل .. جدودك
لابد تعرف أن خوفك أزمتك .. من لازمتك
وإن إنت من غير الكرامة .. فرطت ياحلو في .. حدودك


لو منحوك الدهب غار الدهب .. بالملوك
يا وطننا فيك العجب مملوك ورا .. مملوك
وإن خيروه الظلم .. ييجي ويتحكم
هيقول ياأهل الوطن دنا وسطكم .. صعلوك


رحت لديوان المظالم يمكن ألاقي .. مغيث
تاري الديوان مملكة سلطانها مين ؟ .. إبليس
قعدت فوق الرصيف .. أحلم بنص رغيف
سرقوا الرغيف م الحلم ورموني للكوابيس


أنا قلبي لو مش جدع كان اتمزع م .. الخوف
بيشوف تمللي الحقايق وياريته ما .. بيشوف
نصحته يوم يتغاضى .. بعض التغاضي عبادة
قال وازاي أسيب البلادة تلعب على .. المكشوف


خَدني وقال هسجنك لازم مادمت .. حمار
ده حتى البهايم بقت من طايفة .. الشُطار
حتى القرود ع الحبل .. والنطاطين والهُبل
أنا قلت سجن وعقل ولا يوم يصيبني .. العار


على كل لون اترسم وشك يابو .. وشين
فين طب لون الكرامة تتلونه .. ياحزين
قاللي الزمن ده كده .. معدتش فيه الرضا
ومنين نجيب الهدى في عالم الـ .. مجانين


قالوا الحنش ف الجُحر خليك هنا .. تحاشاه
وإن كنت فاكره يصاحبك يبقى انت عقلك .. تاه
قام قال دنا مربيه .. ومعلمه وقاريه
ولما راح يخاويه أكله الحنش .. ف عشاه


قالوا إن عشقت اعشق قمر فضحكت .. خخ
قالوا أن سرقت أسرق جمل أنا قلت .. أخ
اشجاب لجاب العشق لسريقة الجمل .. قال محتمل
إيه العمل مادمنا ياصاحبي فوطن عايش في .. فخ