قصيدة الى الله هذا الزمان

محمد الذهبي
2017 / 8 / 5

قصيدة الى الله هذا الزمان
محمد الذهبي
الله اللي تعرفه صار بس تاريخ
ولفظة باطل وحطت عله لسانك
الله تبوك بيه والله جوازك صار
تعبر بيه عله شاجور عدوانك
الله لليبوك والله للمبيوك
والله طلقتك واتصيب نيشانك
والله يندهك ايكلك ابساعك كوم
غبّش للكتل وامسرفن اردانك
والله ايكلك اشبيه الرصيف اوياك
اخذه وسجله بسمك ويّه عنوانك
والله الكالك اكتب عله اليحجون
واخطف كل طفل يحجي اعله ربّانك
والله العلمك تاخذ شهاده اكلاو
اتزور واليريد ايشوف ميدانك
عله راس المولد راسم اسم الله
واتبوك الخلك بأمبير ميزانك
وبالمدرسه اتحط الله اعله راسك فوك
وتحلف بيه مثل ماجان ديدانك
وبالمستشفى فوكك الله فوكك فوك
لاجن بالمريض اسنون شيطانك
وبالجامع شفت الله عله الحيطان
بس ماشفت الله ابصيحة اوذانك
وبالمعمل تحط الله عله البيبان
هذا من فضل ربي اعله بيبانك
فضل ربك حرام وجذب والتزوير
اشلون اتخلي ربك ناب شيطانك

مو هذا الاله الجنّه نحلم بيه
من اتعد تتيه ابعدد نسوانك

مو هذا الاله الكتله يا الله
نجحني وانِتْ نايم عله اعنانك

آنه انجحت بس انته خذاك النوم
هسه اتبيع بيّه ابسوك سلطانك

دايح فاشل وحسره عليك الآه
هسه انته الزعيم ابراس خوّانك
راتب بالصبح راتب ابنص الليل
راتب بالظهر تاخذ اببستانك

مانحجي بعد جم الله صار اهناه
حطّه ابجيبك اولتعوفه بمجانك

مو هذا الاله الجنت اشوفه اهناك
عله لحية فقير ابليل سجانك
الله براحتك صار انته تصنع بيه
تيهت الدرب من كثرت الوانك