زجل

عبد العاطي جميل
2014 / 10 / 23

...
اللغة فارة
حكارة
تصول وتجول
بمرسوم ..
و كلام جدي
دصارة
ممنوع فالجوامع
فلكتوب
ما عندو سوم ..
جدي كان عايق
خباني فشونو
وأنا مازال نونو
فحفيرة نعوم
خباني فغواتو
زرعني فدواتي
حتى نشفات
و خرجت منها فازك
نكتب بصمخ حمق
حكايات اليوم ..
حكايات البوم
ملات لعيون
و السبع الداصر
الخاسر
للي غلبو النوم
بعدما سكر
السبع الفرماش
عايش فالفرماج
ولحم الصيد بزاف عليه ...
...
خليلني ساكت
فدواخلي كلام يغلي
منو نشرح برارد
و يشيط الخير ..
خليني ساكت
لساني نساني
ومن الخوف
تلف لحروف ...
...